O Concello de Boiro, xunto co grupo de voluntariado xuvenil Turbina, organiza un programa completo de actividades para conmemorar o Día Internacional do Orgullo, que será o venres 27 de xuño. O alcalde, José Ramón Romero, e a concelleira de Cultura, María Outeiral, participaron na presentación de actividades xunto con Antón Abeijón e Yolanda Egido, do grupo de voluntariado Turbina.
As actividades desenvolveranse no paseo marítimo de Barraña, a carón do edificio das Colonias de Praia Xardín, e comezarán ás 18.00 horas con obradoiro de tye-die, un photocall e un mural de mensaxes.
Ás 20.00 horas terá lugar a lectura do manifesto e seguidamente actuación de DJ Páraba Boba. A celebración contará cunha festa de po holi a partir das 20.30 horas.
Contarase tamén cun stand da campaña Agresión Off da Xunta de Galicia e, para conmemorar o Día Internacional do Orgullo, o Concello de Boiro está tamén adherido á campaña Liberdade de ser e sentir da Deputación da Coruña.
