O Rally Terras do Incio ultima os preparativos para unha nova e esperada convocatoria. A 12ª edición celébrase este ano do 18 ao 24 de xuño e unha vez máis percorrerá as terras galegas e as súas máis recónditas paraxes, para o deleite dos seus participantes e tamén dos espectadores.
Esta cita consolidouse entre os amantes do motor clásico e xa é todo un referente no sector pola calidade dos seus roteiros, establecementos e aloxamentos, pero sobre todo polos seus vehículos. Verdadeiras pezas de museo dos anos 1950 e posteriores, como Mercedes, Aston Martin, Masserati, Ferrari, Xaguar… Vehículos con historia que poderán contemplarse en diferentes puntos da xeografía galega.
O vindeiro mércores 18 de xuño, a praza do Concello de Sober será testemuña do arrinque deste evento. Alí os participantes, moitos deles repetidores, volven ao rally para apoiar o turismo de calidade e potenciar a economía local destes recunchos.
O xoves as Terras do Incio serán as protagonistas con paseo pola Ribeira Sacra, Cruz do Incio, Serra do Caurel e visita ao Museo do Ferrocarril.
O venres o rally emprende camiño a Santiago de Compostela, atravesando pantanos e pontes de ferro, con parada no Museo do Peregrino e pola noite termina no parador de Muxía na Costa da Morte.
O sábado o percorrido por parte da Costa de Morte, o Faro de Vilán, Camariñas e Fisterra, farán as delicias dos participantes con paradas e comidas para gozar a gastronomía galega en todo o seu esplendor.
O domingo empeza con visita ao Museo MAHI en Arteixo e logo o rally emprenderá a súa traxectoria cara a Ribadeo, onde todos gozarán de dous días con roteiros por casa indianas, capelas e máis, visita á praia das Catedrais e á Fábrica de Sargadelos.
Andrés Castro e Pilar Debelius empezaron esta aventura hai xa doce anos, coa intención de compartir cos seus seres queridos o amor por Lugo e as terras de Incio. A día de hoxe son moito máis zonas as que se foron engadindo a esta imprescindíbel cita do motor, aínda que o carácter do mesmo segue intacto. Promocionar e gozar Galicia como unha reunión de amigos, contando co apoio das institucións locais, aloxamentos, museos e establecementos e de todos os que fan posible que cada ano sexa un éxito.
A organización, respecto da non inclusión do rally no centro histórico de Compostela, fixo saber que esta ausencia débese “á negativa do Goberno Municipal a autorizar a súa exhibición no Obradoiro”, sinalaron.
