A Deputación da Coruña vai conmemorar o Día da Diversidade Sexual impulsando a campaña de sensibilización Liberdade de ser e de sentir. Os detalles da iniciativa foron compartidos pola deputada de igualdade, Soledad Agra, acompañada de Ana García, de Alas A Coruña; Victoria Fernández da compañía, Pérez & Fernández e Emi Candal, da produtora Urdime. A través da nova campaña de Liberdade de ser e de sentir, sinalaron, apélase á “complicidade” dos 93 concellos da provincia e convida a adherise á iniciativa a aquelas entidades do tecido asociativo que estean interesada en participar, asumindo 3 compromisos moi sinxelos. Estes son:
-Iluminar un espazo público coas cores da bandeira LGTBQI+.
-Expoñer publicamente a bandeira LGTBQI+.
-Difundir a campaña nas redes empregando o cancelo #seresentir.
“Desde a Deputación queremos que os recursos, a información e a visibilización do colectivo cheguen a todos os concellos da provincia, independentemente do seu tamaño e orzamento”, sinalou a deputada.
Actividades anuais
A campaña iniciouse o pasado 31 de maio coa celebración da IV edición do congreso Memoria Diversa, que centrou a reflexión sobre os novos e vellos discursos de odio contra o colectivo LGBT, creando espazos de encontro e reflexión arredor da memoria do colectivo LGBTIQA+ en Galiza. O congreso foi gravado e está dispoñíbel na canle de YouTube da Deputación da Coruña.
Ademais do congreso, inclúe diferentes actividades que se desenvolverán nos vindeiros meses xa que, tal e como sinalou a deputada, “na Área de Igualdade da entendemos que o activismo polos dereitos das persoas LGTBQI+ non debe cinguirse a un único día no ano, polo que a programación que compón a campaña estenderase durante meses”:
· Acto institucional do día 27 no Pazo da Deputación con lectura dun manifesto e unha lectura colectiva de fragmentos de literatura queer galega.
· Desenvolvemento de tres palestras: Institucionalización das persoas LGTB; Medidas para a igualdade e non discriminación das persoas LGTB no ámbito laboral e Corpos e sexualidades disidentes.
· Representacións teatrais para distintos públicos espalladas por 20 concellos da provincia procurando chegar ao maior número de comarcas do territorio como segue: 10 representacións da obra Rosa e azul, de Pérez & Fernández, dirixida a público infantil e 10 representacións da obra Vicio houbo sempre, de Atenea García e dirixida a público adolescente e adulto.
· Creación de contidos informativos descargábeis para que concellos e entidades poidan dispor deles nos puntos de información LGTB que organicen.
· Actualización da páxina web seresentir.gal con novas propostas de literatura LGTB, recompilación de recursos audiovisuais (curtametraxes, películas e series con representación diversa) e ligazóns a materiais de libre acceso, así como suxestión de contidos para diferentes idades.
· Instalación de puntos LGTB en 8 concellos da provincia.
· Envío de merchandising a concellos de menos de 30.000 habitantes.
“A loita do colectivo LGTBIQ+ non é só unha loita legal, senón tamén polo dereito a vivir con dignidade, sen medo, sen violencia e sen discriminación” apuntou Agra. “Unha loita pola liberdade de ser, estar e sentir. E estas campañas, por desgraza, seguen sendo moi necesarias.”
Engadiu que a Información irase actualizando na web seresentir.gal e faranse comunicacións periódicas a concellos e entidades adheridas informando das novidades. Para consultas e suxestións habilítase o correo electrónico seresentir@dacoruna.gal e o teléfono 646 908 177.
