O Consello da Xunta tomou razón hoxe da aceptación da cesión gratuíta dunha parcela situada en Marxión, ofrecida polo Concello de Vilagarcía, co obxectivo de construír un edificio de dez vivendas públicas. Esta actuación será executada a través da Sociedade de Vivenda Pública de Galicia.
A parcela cedida conta cunha superficie de 675 metros cadrados, e permitirá dar un novo paso no compromiso do Goberno galego de duplicar o parque público de vivenda na comunidade de aquí a 2028.
A Xunta licitará proximamente o contrato para a redacción do proxecto e a dirección das obras, avanzando así na planificación desta nova promoción de vivenda protexida.
Este proxecto en Vilagarcía inscríbese na Estratexia galega de solo residencial, coa que a Xunta, en colaboración cos concellos, pretende facilitar solo urbanizable para a construción de 25.000 vivendas, das cales 20.000 serán protexidas.
Ademais, en paralelo, a Administración autonómica está a analizar as catro ofertas recibidas para a redacción do proxecto de interese autonómico que transformará o ámbito situado entre a avenida das Carolinas e as rúas Coca e Arealonga, onde se prevé a construción de 350 vivendas, das cales o 80% serán de protección pública.
Con máis de 2.200 vivendas públicas xa en marcha en cidades como Vigo, Pontevedra, A Coruña, Santiago, Ourense, Lugo ou Ferrol, o Goberno galego continúa a acelerar o seu plan de ampliar o acceso á vivenda e garantir un fogar digno para a cidadanía.
