Ribeira será este venres 16 de maio o escenario dunha cita musical de primeira liña coa artista galega Mercedes Peón, que chega cun espectáculo
singular: Ingrávida, actuación encadrada nas celebracións dos 25 anos da estrea do seu primeiro disco, Isué, e, segundo avanzou o Concello, suporá “unha oportunidade única para gozar en directo dunha das voces máis vangardistas e influentes da música galega contemporánea”.
Esta actuación tamén forma parte da programación especial de Cultura para conmemorar o Día das Letras Galegas.
Ingrávida é unha homenaxe á creación colectiva e á riqueza da nosa tradición, reinterpretada con olladas novas e cunha posta en escena que viaxa entre o acústico e a electrónica. Mercedes Peón ofrécenos un percorrido polo seu potente repertorio, nutrido de anos de recollidas de campo, traballos cinematográficos e colaboracións en proxectos de danza, sempre cun espírito inquedo e comprometido coa innovación cultural.
Neste espectáculo, Mercedes Peón está acompañada por mulleres ás que admira profundamente, como o Dúo Caamaño & Ameixeiras, o grupo de voces líricas Galíricas, as agrupacións tradicionais Raigañas de Cerqueda e Xirifeiras, e as artistas Mónica de Nut, Ana Fernández e Laura Iturralde, que se encargará das proxeccións en directo.
O evento realizarase no Auditorio de Ribeira o vindeiro 16 de maio cunha duración de 70 minutos. As entradas están dispoñíbeis por só 3€ no Concello de Ribeira ou na web ataquilla.com.
