O Concello de Rois completou na mañá deste domingo 18 de maio a ampla programación das festas do Santo Isidro e das Letras Galegas coa celebración dunha multitudinaria camiñada.
Na sexta edición da Andaina do Santo Isidro Letras Galegas participaron máis de 270 persoas, que percorreron algunhas das paraxes máis fermosas do municipio, como a zona dos Fondos (pasando pola ponte de Camilo Seira) ou a praia fluvial de Seira.
O concelleiro de Deportes, José Luis Ares, deulle a benvida a todos os participantes antes de dar a saída.
No momento de recoller o dorsal, as persoas adultas foron agasalladas cun libro da Biblioteca Municipal.
A andaina, de 14 quilómetros de percorrido e con motivo das Letras Galegas, centrouse nesta ocasión na tradición oral de Rois e, por iso, en cada punto quilométrico había unha copla relacionada co municipio, recollida da recompilación realizada polo etnógrafo roisenses Clodio González.
Ademais, o Concello de Rois sortea unhas zapatillas deportivas entre todas as persoas inscritas. Para entrar no sorteo é necesario que facer algunha foto dalguns dos sinais que marcan os diferentes puntos quilométricos do percorrido (no que aparecen as coplas) e publicala en Facebook ou Instagram co cancelo #Roiscoasletras (o post ten que estar e modo público para acceder ao sorteo).
Voluntarios de Protección Civil de Rois e de Padrón colaboraron co Concello de Rois durante o desenvolvemento da proba.
