O Grupo Parlamentario Popular solicita que o Goberno aproveite a cesión de obras do Museo do Grabado e a Estampa Dixital de Artes para difundir a arte gráfica española dentro e fóra do país. A moción do Senador Popular ribeirense Manuel Ruíz Rivas foi aprobada co apoio do seu grupo e o voto contrario do PSOE e Suma Madrid.
O Museo do Grabado e a Estampa Dixital de Artes, situado na parroquia de Artes en Ribeira, podería dar un novo paso no seu recoñecemento internacional grazas a unha moción presentada polo Grupo Parlamentario Popular na Comisión de Cultura do Senado. A iniciativa, impulsada polos senadores Manuel Santos Ruiz Rivas e María José Ortega Gómez, insta ao Goberno a asinar un convenio co Concello de Ribeira e o propio museo para promover a súa colección a través do Instituto Cervantes.
O museo, xestionado pola Fundación Rural Artes, alberga unha das maiores coleccións privadas de gravado de Europa, con preto de 40.000 pezas que abranguen desde o século XV ata a actualidade. A súa actividade cultural inclúe colaboracións con universidades como as de Salamanca e Santiago, e organización de obradoiros de emprego e exposicións itinerantes que xa chegaron a países como Estados Unidos, Costa Rica ou Portugal. Está previsto que no próximo ano parte da súa colección se exhiba tamén en China e Alemaña.
Os populares destacan a oportunidade que supón esta colaboración para difundir a obra de grandes gravadores como Goya, Dalí, Chagall ou Picasso, presentes na colección, e salientan o compromiso desinteresado do museo ao ofrecer en préstamo as súas obras para exposicións nacionais e internacionais.
A moción propón que o Ministerio de Cultura e outros organismos públicos colaboren na promoción deste espazo único situado nas inmediacións do Parque Natural das Dunas de Corrubedo, co obxectivo de fortalecer o papel de Galicia e España como referentes na arte gráfica a nivel global.
