Todo listo no adro da Igrexa de Fruíme (Lousame) para acoller este sábado 17 de maio a primeira Romaría das Letras, unha iniciativa cultural que xunta música, contacontos, obradoiros e reivindicación da figura de Diego Zernadas de Castro, o cura de Fruíme. Unha iniciativa organizada polo Concello de Lousame, en colaboración coa asociación de veciños Zernadas de Castro de Fruíme, a Consellería de Cultura, Lingua e Xuventude e a Deputación da Coruña.
As actividades arrincarán ás 11:00 horas cunha exposición sobre a vida e obra de Zernadas de Castro que poderá visitarse durante toda a xornada. Ás 12:30 horas celebrarase a tradicional ofrenda floral diante do busto do cura de Fruíme, seguida dun concerto da Banda de Música de Lousame. Ás 13:30 horas, homenaxe ás cantareiras locais da man do grupo de pandereteiras de Lousame da UNED Senior, á que seguirá unha actuación da Asociación Cultural O Son do Pote.
Pola tarde, a partir das 16:00 horas, o adro da igrexa de Fruíme acollerá unha serie de obradoiros culturais, que ás 18:00 horas darán paso a un contacontos da man de Raquel Queizás. O programa rematará coa actuación de Xoán Curiel e o seu espectáculo Treides Comigo – Alén, a partir das 19:00 horas.
