O Laboratorio Ecosocial do Barbanza celebrou este mércores en Leiro (Rianxo) un obradoiro de prospectiva comunitaria orientado a construír unha visión compartida sobre o futuro dos montes veciñais e a definir accións concretas para facela realidade.
A actividade, aberta a comuneiros e non comuneiros de todas as idades, foi coordinada pola Fundación Montescola, entidade especializada en educación ambiental e dinamización comunitaria. O obradoiro ten como obxectivo implicar á veciñanza na xestión sostible dos montes, empregando unha metodoloxía participativa baseada na imaxinación colectiva do monte a 30 anos vista.
Durante a xornada, que incluíu sesións de traballo, unha visita de campo e un xantar comunitario con produtos do monte, as persoas asistentes colaboraron na elaboración dun Plan de Acción Comunitaria para Leiro, que recolle os pasos consensuados para avanzar cara a ese futuro desexado.
A iniciativa conta con financiamento europeo a través da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), sustentado polos fondos NextGenerationEU.
Coordinado pola Fundación RIA, o Laboratorio Ecosocial do Barbanza traballa pola sustentabilidade ambiental e a resiliencia territorial, apostando pola implicación activa da cidadanía na gobernanza dos recursos naturais da comarca.
