O Concello de Rois celebrou esta semana unha data moi especial: o 102 aniversario de Josefina Lago Rey, veciña da aldea de Macedos, na parroquia de Urdilde. O alcalde, Ramón Tojo Lens, achegouse persoalmente ata o seu domicilio para trasladarlle as felicitacións en nome de toda a veciñanza.
Acompañada pola súa filla Chelo, que a coida con dedicación e tenrura, Josefina recibiu un ramo de flores, unha felicitación personalizada e unha medalla conmemorativa como mostra do aprecio e respecto do municipio. Un recoñecemento máis que merecido para unha muller que dedicou a súa vida ao traballo no campo, á casa e á familia.
Ata os 94 anos, Josefina seguía cociñando, demostrando unha vitalidade que sorprende e inspira. Sobre o segredo da súa lonxevidade, ela mesma confesaba ao cumprir os 100 anos que está en “levarse ben con todo o mundo”.
Desde o Concello de Rois, trasladamos os nosos parabéns máis sinceros a Josefina e desexámoslle moita saúde e felicidade neste novo ano de vida. O seu exemplo é un orgullo para toda a comunidade.
