A vila noiesa vai celebrar esta fin de semana a segunda edición do programa Noia En-Cántame. O programa de actividades, presentado os días pasados polo concelleiro de Cultura, Pepe Pérez, inclúe música en directo en dous emprazamentos emblemáticos da localidade, achegando concertos a veciños e visitantes durante toda a xornada do sábado 31 de maio.
A entrada aos mesmos será libre até completar o aforo.
O edil explicou que nesta edición os concertos realizaranse en dúas sedes diferentes e “moi representativas cultural e turisticamente” como son Santa María A Nova e o Coliseo Noela. As actuacións comezarán en Santa María ás 12.30 horas coa Coral Feminina Barbanza e Habanoia, e proseguirán pola tarde, no mesmo emprazamento, a partir das 18.30 horas, co Coro Xuvenil Aires do Atlántico e o Grupo Vocal e Instrumental Atlántico. A partir das 20.30 a actividade musical trasládase ao Coliseo Noela, con Canta Paranoia e o Grupo A Misela.
