Este venres 16 de maio arrancou a iniciativa De Pobra a Portosín, tapeando polo mar, organizada polas asociacións de empresarios da Pobra e Azul de Portosín e a de hostalería de Ribeira, coa finalidade de poñer en valor os produtos do mar da zona, dinamizar o comercio e a vida socioeconómica destas localidades, e fomentar a colaboración entres os concellos nas que se sitúan.
A acción, que se desenvolve os días 16,17, 30 e 31 de maio, e o 6 e 7 de xuño, conta co apoio económico de Mar. De feito, a inauguración da iniciativa contou coa presenza do conselleiro do Mar, Alfonso Villares.
Tapeando polo mar busca impulsar o consumo de peixe local e de tempada, ademais da actividade turística que leva aparellada a actividade marítimo-pesqueira da comarca. Os produtos protagonistas serán o mexillón, o atún e a anchoa, que rotarán entre as tres localidades, de modo que cada unha delas acollerá actividades centradas nas tres especies en distintos fins de semana.
Así, haberá showcookings en directo a cargo de cociñeiros e hostaleiros locais e foodtrucks con propostas culinarias innovadoras, entre outras propostas de lecer.
