O histórico grupo Teatro Airiños, con sede na parroquia rianxeira de Asados, vai festexar a cultura galega este 10 de maio en colaboración co Concello de Rianxo e a Deputación da Coruña. Estamos a falar da Festa das Letras Vivas en Asados, que terá o seu epicentro na Carballeira do Cura e que dará comezo ás 11.30 horas cunha ollada á literatura local a través da actividade Plumas de Asados, na que participarán, presentando as súas novas propostas editoriais, os escritores locais Ramón Blanco, Maite Mosconi e Rosa Suárez. Logo será a quenda da sesión vermú, a cargo de Bouba Pandeireteiras, a partir das 13.30 horas.
Logo do xantar popular (con empanada, polbo, churrasco e ensalada, sobremesa e bebidas, con inscricións requiridas) volven as actividades literarias ás 17.00 horas co Recital das Letras Vivas, no que poderemos escoller unha autora ou autor viva/o en lingua galega e participar, cun límite de tres minutos por persoa (inscricións en contacto@teatroairinhos.es). A vertente musical virá da man do Cuarteto Riamona.
A partir das 18.30 volve a música con Boroa, grupo de Ribeira integrado por Suso Bello e Sabela Olivares, gaiteira e docente que conta cunha ampla experiencia formativa e interpretativa en Rianxo.
A festa rematará a partir das 20.00 horas co Trivial Cabareteiro, xogo de preguntas en grupo con premio e “moitas sorpresas”. Poderán participar un máximo de 10 equipos, perpetrados con cadanseus teléfonos móbiles (única ferramenta que se precisa para participar no concurso). Inscrición en contacto@teatroairinhos.es.
