O conselleiro de Educación, Ciencia, Universidades e Formación Profesional, Román Rodríguez, visitou hoxe o CEIP Plurilingüe Arealonga de Vilagarcía de Arousa, onde a Xunta de Galicia vén de iniciar obras de ampliación cun orzamento de 712.000 euros.
Durante a visita, o conselleiro destacou que o Goberno galego está a acometer este ano investimentos por máis de 4,6 millóns de euros en tres centros educativos do municipio. Ademais da intervención no Arealonga, avanzan as obras de ampliación do CIFP Fontecarmoa e está a piques de comezar a instalación dun ascensor no IES O Carril.
“Con estas actuacións demostramos o compromiso do Goberno galego, ao abeiro do Plan de nova arquitectura pedagóxica, coas instalacións educativas deste concello pontevedrés”, sinalou Rodríguez.
Melloras no CEIP Arealonga
As obras no CEIP Arealonga inclúen a ampliación do edificio en 130 m² e a reforma doutros 506 m². Os traballos, cun prazo de execución de seis meses, teñen como obxectivo mellorar a accesibilidade e reorganizar os espazos do centro. Está previsto instalar un ascensor, un novo núcleo de escaleiras e un aseo adaptado. As distintas edificacións quedarán conectadas por pasarelas cubertas para garantir un acceso cómodo e a cuberto entre os distintos módulos.
Tamén se dotará o colexio dun novo comedor e dunha sala para a ANPA, así como doutros espazos complementarios. Ademais, mellorarase a eficiencia enerxética mediante o illamento térmico da fachada, a renovación parcial de fiestras e cubertas, e a substitución das luminarias.
Avances no CIFP Fontecarmoa
No Centro Integrado de Formación Profesional Fontecarmoa, as obras de ampliación avanzan a bo ritmo e xa se atopan executadas ao 20 %. Cun investimento de máis de 3,7 millóns de euros, prevese construír máis de 2.200 m² adicionais, especialmente no edificio de talleres. O edificio principal medrará en 335 m² e a actuación permitirá reorganizar os espazos, crear un soto técnico para instalacións e mellorar a funcionalidade do centro.
Nova accesibilidade no IES O Carril
Por último, no IES O Carril está previsto instalar un ascensor cun orzamento de preto de 170.000 euros. A actuación completarase coa creación dun aseo accesible na planta baixa, así como coa renovación do falso teito e das luminarias nos principais vestíbulos e corredores das tres plantas do edificio.
