A Pobra do Caramiñal dará acollida os días 24 e 25 de maio ao Torneo Internacional CONGALSA de fútbol base, a favor da Fundación Aladina.
“Este torneo vai moito máis alá do fútbol. É un torneo cun forte compoñente solidario. […] O que se ve aquí é o fútbol como unha ferramenta de apoio aos demais. De solidariedade, de traballo en equipo, de xenerosidade e de compromiso” apuntaba Ana Garrido, xefa de relacións externas da empresa local CONGALSA.
Pola súa banda, Roberto García Fernández, xefe do Servizo Provincial de Deportes da Coruña, Roberto García Fernández, sinalou que “o deporte para nós non é soamente competición, é tamén saúde, calidade de vida e orgullo de país. Un dos obxectivos é, sen dúbida, que os nenos se divirtan, ademais da competición. O noso aporte neste campionato tamén é desenvolver o turismo. O binomio turismo-deporte é positivo para todos”.
O concelleiro de deportes, Eloy Sobrido García, comentaba: “Dende o Concello da Pobra estamos encantados de acoller un torneo que mistura deste xeito deporte e solidariedade. Estamos enormemente agradecidos con CONGALSA, con todas as entidades implicadas e moi sinaladamente coa fundación Aladina, polo gran labor que realizan”.
Unhas 4.000 persoas pasarán pola comarca, sendo este un Torneo que acolle a 39 equipos da categoría alevín de diferentes comunidades autónomas do país, así como equipos procedentes de Portugal e Francia. O Torneo desenvolverase no Estadio da Alta da Pobra.
