O alcalde de Boiro, José Ramón Romero, participou na entrega do cheque coa recadación da I andaina solidaria peñeira a ASANOG xunto con David Laíño, presidente de Peñas Boiro AC e Sara de ASANOG. A recadación total das inscricións e doazóns foi de 6.000 euros, ao que se suma todo o recadado polo merchandising e as huchas que a propia asociación tivo durante o día. A actividade desenvolveuse o pasado domingo 11 de maio e contou con 701 participantes inscritos mais 52 persoas que colaboraron co dorsal 0. Esta doazón contribúe ao labor que ASANOG fai de apoio ás familias de adolescentes e nenos e nenas con cancro. “A veciñanza de Boiro sempre demostra a súa solidariedade participando en iniciativas como esta e cando o recadado vai para favorecer o traballo tan bo que fan dende entidades como ASANOG”, recoñeceu o alcalde.
