O Concello de Ribeira completou recentemente as obras de pavimentación e renovación do saneamento na rúa do Colexio de Corrubedo cun investimento de 67.000 euros. Esta intervención forma parte dun plan máis amplo destinado a mellorar os servizos básicos nas parroquias do municipio.
O alcalde, Luís Pérez Barral, acompañado dos tenentes de alcalde, destacou que “estas actuacións responden ás demandas veciñais e teñen como obxectivo mellorar a calidade de vida da xente, garantindo uns servizos públicos á altura”.
A mellora na rúa do Colexio engádese a outras actuacións recentes, como a renovación do saneamento na rúa Buenos Aires (45.000€), a pavimentación e optimización da rede de pluviais na rúa dos Pozos (39.000€) —favorecendo a redución do risco de asolagamentos— e a creación de novas beirarrúas no entorno do Faro de Corrubedo (100.000€), que buscan garantir a accesibilidade e a seguridade viaria.
Ademais, no ámbito deportivo, Ribeira investiu 116.000 euros na parroquia de Saamil para a construción de tres pistas de tenis, ampliando as opcións de lecer e deporte para a mocidade e a veciñanza.
De cara aos vindeiros meses, o Concello xa ten prevista a renovación do saneamento e das pluviais na rúa Canaval, cun orzamento de 45.000 euros.
“Estamos a falar de máis de 412.000 euros destinados a mellorar os servizos básicos, como o saneamento, a seguridade viaria e a accesibilidade, así como as infraestruturas deportivas. Este goberno local está comprometido con dar resposta ás necesidades reais das parroquias e imos continuar nesta liña”, subliñou Pérez Barral.
