A praza de Macías acolleu o pregón e o comezo oficial dunhas festas que continuarán ata o 27 de abril co domingo de Pascuilla
O Concello de Padrón inaugurou oficialmente este sábado, 19 de abril, as Festas de Pascua, un evento anual que combina tradición, deporte e cultura. A triatleta padronesa Martina López Gestal foi a protagonista da xornada, asinando no Libro de Honra do Concello antes de protagonizar un emotivo pregón.
O alcalde Anxo Arca destacou o esforzo colectivo detrás das festas e agradeceu á comunidade o seu compromiso. Durante o acto, conducido pola creadora de contidos Sara Seco Rial, reafirmouse o compromiso con valores como a igualdade e o talento local.
A xornada tamén incluíu eventos destacados como a XLIV Carreira de Pascua, que contou con máis de 600 participantes, e a inauguración da 52ª Feira Exposición de Maquinaria Agrícola e Industrial, consolidada como referente no sector galego.
A presentación da inauguración correu a cargo de Sara Seco, creadora de contido e premiada no certame Youtubeiras + polo seu traballo en TikTok. A comunicadora, orixinaria de Valga, foi a encargada de conducir o acto de apertura das Festas de Pascua. Con esta escolla, o Concello de Padrón quixo reforzar o seu “compromiso coa visibilidade das mulleres no ámbito cultural e festivo”, así como co talento da comarca e dos pobos irmáns, como tamén se reflectiu na elección do ilustrador lestrovense Mateo Pardal como autor do cartel oficial das festas.
Logo do pregón deste sábado, a festa proseguiu coas actuacións de La Fórmula, que celebrou os seus 10 anos cun espectacular directo, e Unión y Fuerza, orquestra padronesa de referencia.
O Domingo de Pascua (este 20 de abril) converterase na Noite Xove, cunha programación especialmente pensada para o público máis novo. Desde as 19:30 horas, Magos, unha formación nova e dinámica, ofrecerá o seu espectáculo antes da emblemática París de Noia, que desde 1957 marca a diferenza co seu escenario móbil de última xeración. Á 1:00 horas, Ricky Galende presentará o seu espectáculo de música, son e iluminación Renovation Experience no paseo do Espolón, garantindo unha noite de festa e diversión.
O Luns de Pascua, o protagonismo recaerá dende as 21:00 horas en Los Satélites, con máis de 80 anos de traxectoria, e ás 22:30 horas en Olympus, unha das orquestras máis espectaculares de Galicia con escenografía, coreografías e luminotecnia de alto nivel.
O martes, o Dúo Máster de Padrón animará a xornada antes da chegada ás 23:00 horas de Panorama, unha das orquestras máis populares de España cunha media de 200 actuacións anuais.
Máis propostas durante a Pascuilla
Desde o Concello de Padrón búscase ofrecer unha programación musical pensada para todos os gustos, combinando modernidade e tradición. Así, durante a Pascuilla, a música seguirá enchendo as rúas de Padrón con bandas como Los Wavy Gravies, Five Star Service ou Banda de Nash, ademais de orquestras como América, Kubo, Marbella e as padronesas Atenas e Charleston que suma xa dúas décadas enriba do escenario. O venres da Pascuilla estará marcado pola predominancia do rock, reforzando así a diversidade musical e apostando por novas propostas para todos os públicos.
A Banda da Loba, grupo galego integrado por cinco mulleres que fusionan pop, blues, folk e rock, será outro dos grandes atractivos destas festas en Padrón. Ademais, o Tributo a El Canto del Loco e as sesións dos diferentes DJs no Open Air garanten unha festa completa ata a madrugada.
Como antesala á tirada de fogos de artificio á medianoite do domingo de Pascuilla, que marcará un dos momentos máis destacados das festas, o público poderá gozar dunha serie de proxeccións audiovisuais que engadirán unha dimensión especial ao evento.
