A Sociedade Cooperativa Galega do Mar Santa Uxía de Ribeira, coñecida como OPP83, será unha das protagonistas do XVII Encontro de Embarcacións Tradicionais de Galicia, que se celebrará no Porto de Ribeira entre os días 17 e 20 de xullo. Como parte do evento, a OPP83 organizará unha degustación gratuíta de Lirio de Ribeira o 18 de xullo, na que está previsto repartir máis de 1.000 racións de peixe gratis. Esta iniciativa busca poñer en valor a marca colectiva da organización e fomentar o consumo de peixe na poboación.
Durante a presentación oficial do encontro este sábado, a xerente da OPP83, María José Casais, agradeceu aos organizadores, destacando que o evento é “un gran escaparate da cultura mariña de Galicia e unha oportunidade única para dar a coñecer o Lirio de Ribeira e as súas propiedades nutricionais”.
O Encontro de Embarcacións Tradicionais de Galicia, que tivo a súa primeira edición en Ribeira en 1993, celébrase cada dous anos nunha localidade da costa galega e, por segunda vez na súa historia, recala na capital do Barbanza. Nesta ocasión, prevé reunir máis de cen embarcacións tradicionais procedentes de toda España. A participación da OPP83 neste evento forma parte do seu Plan de Produción e Comercialización de 2025, cofinanciado pola Xunta de Galicia e o FEMPA.
