Comezou a conta atrás para unha das probas deportivas máis destacadas da tempada: a nova edición (a número 11) da Carreira pola Diversidade da asociación inclusiva Ambar, que, para quen non o saiba ten aberto o prazo de inscrición a través de Cronotec. A cita será o 11 de maio con saída na explanada de Coroso (Ribeira) a partir das 10.00 horas. Haberá media ducia de categorías: andaina con ou sen mascota, zapatilla, zapatilla inclusiva, handbike, cadeira de atletismo e infantil. A maiores, as persoas que queiran contribuír sen participar directamente na carreira poden facelo co dorsal 0. Entre os importantes padriños da proba deportiva atópase o youtuber Olaxonmario, que compartiu un vídeo facendo un chamamento á participación. Polo que se refire ás empresas e entidades patrocinadoras, cóntase con Ramiro Carregal, JEALSA ou CONGALSA, entre outras.
Como dixemos, a Carreira terá lugar o domingo 11 de maio, ás 10:00h na explanada de Coroso, Ribeira. Despois da proba absoluta, desenvolveranse as probas infantís e tralo remate destas entregaranse os galardóns ás persoas premiadas nas distintas categorías.
A Carreira da Diversidade naceu no 2015. En palabras da asociación inclusiva Ambar, “a proba supuxo todo un avance na comarca ó tratarse dunha competición inclusiva que incluía as modalidades hand bike e cadeira de atletismo, excluídas na maioría das probas de Galicia”.
Mila López Vernet, Álvaro Illobre, Álex Ferradás e José Manuel de la Iglesia, deportistas paralímpicos, son asiduos á competición dende os seus inicios.
Así mesmo para a promoción da Carreira nas diferentes anualidades Ambar contou co respaldo de grandes atletas e deportistas como Desirée Vila, Fabián Roncero, Jesús de la Osa, Fernando Romay, Killian Jornet, Marta Arce, Sabela Pensado, Alberto Boo e Carlos Brión.
Dorsal 0
Para aquelas persoas que non poidan participar nalgunha das probas deportivas, está aberta en cronotec.es a posibilidade de colaborar co Dorsal 0 unha cota solidaria sen límite. A recadación obtida será destinada á organizar saídas e respiros familiares dentro da área de ocio, para que as persoas usuarias sigan desfrutando destas actividades á vez que se ofrece unha posibilidade de conciliación para as familias.
