O conselleiro do Mar, Alfonso Villares, visitou este xoves 3 de abril a sede da empresa boirense JEALSA, que cualificou, na súa estadía na planta de Bodión, “de “axente imprescindíbel na industria de transformación de produtos do mar”.
Así o puxo en valor durante a visita realizada a esta factoría polo ministro desta carteira en Cabo Verde, José Pedro Mauricio dos Santos, e na que o conselleiro sinalou que “para Galicia é fundamental ter presenza empresarial no país africano, pois é un operador de referencia na Unión Europea e no Norte de África, fundamentalmente, no sector dos derivados do bonito”.
A Xunta fixo saber que esta visita consolidou as xestións levadas a cabo nos últimos meses polo responsábel autonómico, e iniciadas na viaxe realizada a este país o pasado ano.
O conselleiro lembrou que as relacións pesqueiras de Galicia con Cabo Verde “teñen un carácter estratéxico, por ser Porto Grande, en Mindelo, unha base loxística mundial de importancia máxima para a frota galega”. Asemade, destacou a relevancia dos seus recursos mariños, especialmente de especies como peixe espada, atún, xurelo e cabala, e a súa localización xeoestratéxica en termos loxísticos.
Ademais, recordou que a frota pesqueira de palangre de superficie pesca en augas da ZEE de Cabo Verde ao abeiro do acordo subscrito entre a Unión Europea e o país insular, que permite faenar, fundamentalmente, aos buques con porto base en Burela, A Garda e Vigo.
JEALSA conta con preto de 3.500 traballadores, pechando o exercicio fiscal con preto de 380 millóns de facturación consolidada.
