Coincidindo co inicio da campaña da declaración da renda, o xoves 3 de abril, ás 12:00 horas no Curro da Praza de Muros, a asociación inclusiva da comarca muradá ADISBISMUR fará unha grande X Solidaria acompañada do alumnado do CEIP Ramón de Artaza e Malvárez e o IES As Ínsuas.
Este acto quere facer un chamamento a toda as persoas que teñen que presentar a declaración da renda para que marquen o recadro 106 de Actividades de Interese Social, o que permitirá que o 0,7% do IRPF vaia destinado a proxectos de carácter social, lembran dende a asociación inclusiva de Muros e Outes.
A xeito de exemplo do que se pode facer con esta X Solidaria, dende ADISBISMUR lembran que cos fondos do 0,7% da declaración anterior, a entidade puido levar a cabo unha mellora da fachada exterior do centro ocupacional que ten en Valadares, no concello de Outes.
Durante o acto deste xoves 3 de abril lerase un manifesto coas principais reivindicacións dos colectivos sociais, dando conta de información sobre os programas que se poñen en marcha cada ano grazas ás persoas contribuíntes que marcan o X Solidario.
A asociación lembra que marcar a X Solidaria non ten custe algún e que marcando o recadro da Igrexa os contribuíntes poden marcar tamén o de Actividades de Interese Social, co que axudarán “o dobre, co 1,4% do seu IRPF”.
Máis información en EAPN Galicia 604 028 198 www.xsolidaria.org.
