A alcaldesa de Santiago de Compostela, Goretti Sanmartín, anunciou este venres dous importantes avances para a cidade: a posta en marcha da terminal de pasaxeiros da estación intermodal, que se inaugurará en maio baixo a denominación oficial Estación de Santiago de Compostela – Daniel Castelao, e a futura construción dun aparcadoiro con capacidade para 900 vehículos, que estará listo no verán de 2026.
Sanmartín realizou este anuncio tras unha reunión de traballo co delegado do Goberno, Pedro Blanco, e o director xeral de Negocios e Clientes de ADIF, Juan Pablo Villanueva Berltramini. Na xuntanza abordáronse temas estratéxicos como a apertura da terminal, a denominación oficial da estación e o calendario de execución do novo aparcadoiro.
A alcaldesa expresou o seu agradecemento ao Goberno central polo investimento, subliñando a importancia dunha infraestrutura que considera “moi necesaria para Santiago”. Segundo detallou, as obras do aparcadoiro comezarán en setembro de 2025 cun prazo de execución de nove meses e un orzamento de 9 millóns de euros. “Levamos moito tempo demandando esta actuación”, sinalou Sanmartín, quen destacou que o espazo tamén dará servizo á zona do Ensanche.
En canto á nova denominación da estación, Sanmartín lembrou que foi aprobada por unanimidade no Pleno municipal en xaneiro de 2019. A inauguración coincidindo co Ano Castelao confírelle, ao seu xuízo, “un valor simbólico e significativo”. A terminal abrirá xa co nome de Daniel Castelao, figura central da historia cultural e política de Galicia.
A proposta gráfica da nova denominación foi obra do deseñador Pepe Barro, en colaboración coa rexedora. O logotipo, cunha tipografía de inspiración art-decó que evoca tanto a época como a letra característica de Castelao, estará acompañado dun proxecto expositivo que afondará nas distintas facetas do homenaxeado: humorista, escritor, político e símbolo da Galicia do século XX.
“Hoxe estamos de noraboa”, concluíu Sanmartín, quen puxo en valor o legado de Castelao como “referente dun compromiso exemplar con Galicia”. Pola súa parte, o delegado do Goberno asegurou que a estación “non terá nada que envexar” ás doutros puntos do país, mentres que ADIF salientou as melloras en materia de accesibilidade e conectividade que traerá consigo esta nova infraestrutura.
