A céntrica sede da patronal ribeirense en Santa Uxía acolleu este martes 15 de abril a presentación oficial da colaboración entre a Asociación de Empresarios de Ribeira (AER) e a Asociación da Praza de Abastos. Esta alianza nace co obxectivo de “desenvolver conxuntamente proxectos de dinamización comercial e fidelización de clientes, así como campañas e eventos destinados a fortalecer o comercio local”.
Unha das primeiras medidas anunciadas será a posta en marcha de campañas de captación e mantemento de clientes mediante a entrega de tíckets de aparcadoiro gratuítos. Con esta iniciativa, ambas as entidades buscan facilitar o acceso ás zonas comerciais e facer fronte a unha das principais barreiras para o consumo local: a falta de prazas de aparcamento. “Queremos que comprar en Ribeira sexa fácil e atractivo, e eliminar a escusa do aparcamento é un paso crave para iso”, sinalaron desde a organización.
O concelleiro de Mercados, Vicente Mariño, tamén estivo presente na rolda de prensa e mostrou o seu respaldo a esta unión. Mariño destacou “a importancia desta colaboración para o desenvolvemento económico da cidade” e reafirmou o seu compromiso para “seguir traballando pola mellora do Mercado Municipal”. Neste sentido, anunciou que o obxectivo é conseguir “para a Praza de Abastos o recoñecemento como Mercado de Excelencia”.
Ademais, o concelleiro lembrou que xa se puxo en marcha unha das melloras recentes no mercado: a instalación de novos despachos de billetes intelixentes, que permitirán aos clientes poidan gardar as súas compras de forma máis cómoda e flexíbel.
Engadiron que esta nova etapa de colaboración entre AER e a Praza de Abastos busca “xerar sinerxías que beneficien tanto a comerciantes como a consumidores, reforzando o comercio de proximidade como motor económico e social de Ribeira”.
Na cita cos medios de comunicación celebrada este 15 de abril participaron o presidente da patronal de Ribeira, Francisco Martínez Gude, a presidenta da Asociación da Praza de Abastos, Juana Gómez, e o concelleiro de Mercados, Vicente Mariño de Bricio.
