Este 25 de marzo presentouse fíxose en Ribeira unha dobre presentación cultural: por unha banda, a futura Comisión de Festas de Aguiño que collerá a remuda da actual, e pola outra, a presentación do programa da Festa da Xuventude de Aguiño que se celebra o vindeiro 23 de maio, que contará no cartel con El Combo Dominicano e un Festival de DJs.
Na cita deste martes 25 acudiron o tenente de alcalde, Vicente Mariño, o segundo tenente de alcalde, Francisco Suárez-Puerta, o concelleiro de Mar, Fernando Abraldes, o novo presidente da Comisión de Festas de Aguiño, Julio Abraldes, o promotor local de Curotiña Eventos, José Antonio Fernández, máis as compoñentes da Comisión, Teresa Sampedro, Pamela Sampedro e Pilar Millet. A cita celebrouse na Oficina de Turismo, no porto de Ribeira.
Abriu o acto Mariño de Bricio agradecendo o labor da anterior Comisión de Festas de Aguiño por “estes anos de servizo e traballo, sabemos que non é unha tarefa doada pero foron quen de traballar arreo durante anos organizando festas e dende aquí todo o noso agradecemento e respecto en nome do Goberno municipal”. Mariño quixo apelar á resiliencia do pobo de Aguiño: “Síntome orgulloso da fortaleza, da tenacidade dos veciños da miña parroquia; que ten unha gran capacidade para mobilizarse cando é necesario”. Tamén tivo palabras de agradecemento para Julio Abraldes e para os 24 integrantes da Comisión “porque todo isto faise de maneira altruísta e que ten o seu custe en tempo e a nivel familiar”.
Julio Abraldes destacou o feito de que cando lle xurdiu “a responsabilidade de non permitir que Aguiño se quedara sen as Festas do Carme”, a “sorpresa foi que no momento de chamar aos compañeiros e compañeiras que me acompañaron hai 14 anos na Comisión de Festas de Aguiño; dos vinte que chamei viñeron 19, porque un faleceu”. Julio agradeceu tamén “o traballo da anterior Comisión de Festas da que se está á espera de cumprimentar os trámites legais”.
Suárez-Puerta agradeceu o traballo da anterior Comisión: “Fixo un traballo moi bo do que estamos moi agradecidos”. Tamén tivo palabras de gratitude para o pobo de Aguiño “pola celeridade na consecución da nova Comisión, xa que non fomos a buscar a ninguén e foi o propio pobo o que se puxo a organizar o que vai a ser a Comisión de Festas máis numerosa do municipio”.
Para finalizar, José Antonio Fernández, da promotora Curotiña, indicou que xestionan a contratación de El Combo Dominicano ao completo e un Festival de DJs con Dumore e DJ Enter que “conformarán un cartel de primeira para a Festa da Xuventude”. Finalmente agradeceu á futura Comisión e ao Concello porque “fagan que isto sexa unha realidade”.
