Un xeito de salvagardar a memoria dun pobo son as imaxes, as fotografías, os filmes, as postais… Son as postais as protagonistas desta nova, pois dende o Arquivo Municipal de Vilagarcía veñen de realizar o proceso de dixitalización dunha colección de 234 postais que se atopan no Concello. Trátase dunha viaxe á Vilagarcía da primeira metade do século XX, cando a praza de Galicia era Puerta del Sol ou a rúa Valentín Viqueira era a rúa Comercio. Nesta colección tamén hai algunhas imaxes doutros concellos da contorna, como A Illa de Arousa ou O Grove.
Indo á colección de postais, dicir que está agrupada segundo as temáticas (rúas, igrexas, mercado, praias, Illa de Cortegada…) e conta cunha sinatura e edición moi variada. Así, atopamos nomes de autores coñecidos como: Hauser y Menet, Thomas, e outros de marcado carácter local, como Foto Martínez ou M. Reguera.
As imaxes proceden, na súa maioría, de compras que fixo o Concello ao longo dos anos e outras de doazóns de particulares. A dixitalización destas postais, xunto coa levada a cabo das fotografías que compoñen o fondo do Liceo Casino, enmárcase dentro dun proxecto de difusión e posta en valor do material de carácter audiovisual que alberga o Arquivo Municipal.
Ademais de fotografías de Vilagarcía, tamén hai algunhas de concellos da contorna: a praia de Silgar, en Sanxenxo; a Illa e o Balneario da Toxa, no Grove; o porto pesqueiro da Illa de Arousa ou o Pazo de Fefiñáns, en Cambados.
Con esta aposta pola dixitalización, calquera persoa poderá ver estas imaxes a través do portal Atopo, un catálogo documental e bibliográfico da Deputación de Pontevedra en Internet. Neste sitio web pódense ver por exemplo, as actas do pleno dende 1840, é dicir, dende practicamente a creación dos primeiros concellos constitucionais. Pode seguirse a pista documental dos máis diversos asuntos (edificios, urbanismo…) para logo consultarse fisicamente no Arquivo municipal.
Engadir que a documentación achegada polo concello súmase así á que xa ten a Deputación sobre a cidade, que tamén se pode consultar dende Atopo.
