O Concello de Muros quere aclarar a súa posición respecto ás recentes convocatorias e comunicados emitidos pola Asociación Esteirana de Carrilanas.
A alcaldesa de Muros, María Lago, asistiu o pasado 15 de febreiro a unha asemblea convocada pola Asociación Esteirana de Carrilanas. Esta asistencia respondeía a unha petición aprobada por unanimidade na anterior asemblea de decembro de 2024, da que a alcaldesa foi informada tanto por vía privada como a través do rexistro municipal.
Coñecida a orde do día e a unanimidade da solicitude, a rexedora tomou a decisión de participar nesta reunión, nun exercicio de transparencia e diálogo institucional. Ademais, co obxectivo de avanzar na organización da festa e tramitar a documentación e permisos necesarios, o Concello de Muros convocou recentemente unha reunión coa directiva da asociación. Con todo, a directiva rexeitou asistir, aínda que a convocatoria municipal segue en vixencia e as portas do Concello permanecen abertas para retomar o diálogo.
Este venres, 21 de marzo, o Concello tivo coñecemento polas redes sociais da Asociación Esteirana de Carrilanas da convocatoria dunha nova asemblea, na que se solicitaba a presenza da alcaldesa. A diferenza das convocatorias anteriores, esta reunión non incluía orde do día definida e estaba aberta aos medios de comunicación e á veciñanza. Posteriormente, a convocatoria foi remitida ao rexistro municipal e enviada por mensaxe privada á alcaldesa, sen unha solicitude formal da súa asistencia nin concreción da temática a tratar.
Neste contexto, a alcaldesa de Muros considera que o formato proposto non é o adecuado para un diálogo construtivo, polo que decidiu non asistir á asemblea. Con todo, reitera a súa disposición a manter unha reunión coas persoas responsables da Asociación Esteirana de Carrilanas nun marco axeitado para o entendemento mutuo.
Por outra banda, o Concello descoñece os motivos reais polos que a Asociación anunciou esta semana a cancelación da edición 2025 das Carrilanas de Esteiro. O goberno local quere deixar clara a súa vontade de seguir apoiando esta tradicional festa e confía en que se poida celebrar no verán de 2025, reafirmando a súa vontade de diálogo e colaboración para atopar unha solución satisfactoria para todas as partes implicadas.
