O Concello de Rois prepárase para celebrar o Día de Rosalía “cunha programación diversa” que combina gastronomía, música e literatura para renderlle homenaxe á gran poeta galega, segundo informou a Área de Cultura municipal, engadindo que o Caldo de Gloria, inspirado no poema Miña casiña, meu lar, será unha vez máis o protagonista desta celebración, acompañado por actividades culturais ao longo do mes de febreiro.
O domingo 23 de febreiro, os establecementos hostaleiros do municipio ofrecerán unha tapa de caldo de gloria a todas as persoas que se acheguen a degustalo, levando tamén un orixinal pousavasos en homenaxe á autora. Un total de 11 locais participan nesta iniciativa: Mesón A Casiña, Café-bar A Lúa, Taberna Angueira, Hotel Camiño do Mar, Taberna Casa Benjamín, Casa rural Fogar do Selmo, Café-bar Malecón, Bar Muelle, Bar O Pemento, Club de golf Val de Rois e Taberna Venezuela.
A música terá un papel fundamental nesta conmemoración, cunha serie de concertos organizados no Auditorio municipal. O venres 21 e o sábado 22 de febreiro, a Escola Municipal de Música de Rois ofrecerá dous concertos de solistas, mentres que o domingo 23 será Xoán Curiel quen presente o seu espectáculo Treides comigo!, no que tamén participará alumnado da ESMU.
Ademais, dende o 21 de febreiro e ata final de mes, a Biblioteca Municipal de Rois contará cun espazo dedicado a Rosalía, onde as persoas visitantes poderán descubrir novas adquisicións literarias sobre a escritora e facerse unha foto no posadoiro especial preparado para a ocasión.
Un ano máis, o Concello anima a toda a cidadanía a compartir contidos relacionados con Rosalía nas redes sociais entre o 21 e o 28 de febreiro, utilizando os cancelos #RoisconRosalía e #DíadeRosalía. Entre todas as persoas participantes sortearanse dous lotes de libros sobre a autora, un en Facebook e outro en Instagram.
Como parte da homenaxe, o Concello distribuirá 2.025 manteis e 1.000 pousavasos conmemorativos nos centros educativos CPI Os Dices, CPPI O Pumar e A Galiña Azul, así como na Asociación Amipa e no Centro de día de Urdilde.
Ademais, Rois tamén se suma ao VII Festival Rosalía Sen pombas nin flores, impulsado pola Deputación da Coruña, cuxa programación pode consultarse na web provincial.
O Concello de Rois convida a toda a veciñanza a participar nestas actividades para celebrar a Rosalía en comunidade e “manter vivo o seu legado”. Esta programación conta coa colaboración da Xunta de Galicia, da Deputación da Coruña a través da Rede Cultural, así como da Casa de Rosalía, da que o Concello é mecenas.
