A Concellería de Cultura de Ribeira que dirixe Antía Alberte presentou o seu programa cultural para as vindeiras semanas, moi focalizado no teatro e con centro de operacións no novo Auditorio Municipal. Trátase do programa Marzo á Escena, que coincidirá no seu desenvolvemento co Día Mundial do Teatro (o 27 de marzo). A axenda combinará sesións de teatro afeccionado, que serán os sábados ás oito, con actuacións profesionais con feitura de monólogos, previstos para os venres ás nove e cuarto. Esta programación está dirixida a público adulto e será de carácter gratuíto con entrada ata completar a capacidade do recinto.
A primeira das representacións será o sábado 8 de marzo, a cargo da Agrupación Teatral Mariñán coa obra Croquetas. Este é un espectáculo que chega a Ribeira grazas á colaboración da Deputación da Coruña e que vai estar xirando neste mes por varias localidades da provincia para celebrar o día do teatro.
Ao seguinte sábado, día 15 de marzo, chegará a Ribeira o Grupo de
Teatro Airiños de Rianxo coa obra As vellas non deben de namorarse,
unha adaptación do texto de Castelao realizada directora do grupo
Amantia Coello.
O sábado 22 de marzo, a compañía Noite Bohemia, representará a súa
versión da comedia de enredo de Lope de Vega, El perro del hortelano.
E pechará as actuacións das compañías afeccionadas a comedia Asuntos Escuros da Asociación Club de Maiores de Boqueixón, o sábado 29 de marzo.
Respecto dos venres, tal e como se avanzou, ofreceranse dous monólogos profesionais. O primeiro será o venres 14 de marzo, a cargo da artista Bea Campos coa súa obra Marcho que teño que marchar, unha divertida sesión de contos e tamén un espazo para a reflexión sobre os roles e as desigualdades de xénero. É un cesto trenzado con historias protagonizados por mulleres que eran feministas sen sabelo: desde meigas artúricas ata avoas misteriosas.
O venres 28 de marzo achegarase Show de Isi, no que o recoñecido humorista galego fará rir a todo o público asistente coas súas historias do cotiá.
“Presentamos unha programación completa, diversa, variada e que combina compañías afeccionadas con sesións de artistas profesionais
para festexar así tamén o mes do teatro”, explicaron na presentación os responsábeis de Cultura no Concello, engadindo que os monólogos serán os venres ás nove e cuarto e o teatro afeccionado será os sábados ás oito, no novo Auditorio unicipal, con entrada gratuíta por orde de chegada ata completar capacidade. A apertura de portas será media hora antes de cada función.
Sábado 8 de marzo, Croquetas, da Agrupación teatral Mariñán 20:00 h
Venres 14 de marzo, Marcho que teño que marchar de Bea Campos 21:15 h
Sábado 15 de marzo, As vellas non deben de namorarse do grupo de teatro Airiños de Rianxo. 20:00h
Sábado 22 de marzo, El perro del hortelano da compañía Noite Bohemia. 20:00 h
Venres 28 de marzo, O Show de Isi, 21:15 h
Sábado 29 de marzo, Asuntos Escuros, da Asoc. Club de Maiores de Boqueixón. 20:00h
