O PSdeG-PSOE de Outes emitiu este 4 de febreiro un comunicado no que anuncia a súa decisión de saír do Goberno municipal, que pasará a ser un goberno en minoría conformado por CxO e BNG. Respecto das explicacións pola súa marcha do tripartito, explican que “logo da reflexión levada a cabo na organización e de consensualo a nivel local tomei a decisión de abandonar o executivo”, sinala o voceiro socialista en Outes, Tono Caamaño, engadindo que “isto sucede porque despois dun ano e medio de goberno non vimos nin grandes cambios nin pequenos con respecto o goberno anterior”.
Caamaño afirma que “nesta lexislatura seguíronsecometendo os erros do anterior goberno, sen preocuparse o suficiente polo día a día das veciñas e veciños de Outes”. Engaden que “pensamos que dende dentro teríamos máis forza para levar a cabo as nosas propostas, pero non foi posíbel. Levamos 5 anos esperando por un espello, un ano esperando por dous farois e un ano dende que presentamos a ordenanza da tala da madeira, e seguimos agardando”, enumera, criticando ademais que neste momento “non hai nin un alcalde que atenda os veciños como fai falta, xa que como é sabido, agora ten dedicación na Universidade”.
“Os socialistas non podemos continuar dando o noso apoio a un barco que vai a deriva, sen capitán nin contramestre, e vai directo ó acantilado por moito que se lle dea gas á sala de máquinas”, apuntou.
“A partir deste momento volvemos a oposición, onde polo menos poderemos expresarnos sen medo e sen coaccións e defender de verdade as necesidades dos veciños e veciñas, que foron quen nos puxo aquí”, concluíu Caamaño.
