O Concello de Porto do Son comeza o ano con grandes proxectos, algúns deles xa rematados e listos para dar servizo á cidadanía. Entre estes últimos atópanse os novos edificios do Club de Xubilados e máis do Club Náutico. Os inmóbeis, situados na dársena portuaria da fachada marítima, serán inaugurados este venres 10 de xaneiro ás 18.00 cun acto institucional no que participarán José Luis Oujo, alcalde do Son; Manuela Santiago Pouso, presidenta do Club de Xubilados; María José Maroñas Sóñora, teniente de alcalde; Magdalena Pérez Millares, concelleira de Persoal; Juan José Calo Miranda, concelleiro de Medio Ambiente; Carlos Lorenzo Blanco, concelleiro de Deportes e Xuventude e Alicia Martínez Maneiro, concelleira de Cultura.
As sedes do Club de Xubilados e do Club Náutico foron construídas ao abeiro do proxecto de remodelación integral da fachada marítima da vila, que obrigou a derrubar a nave que ocupaban na antiga lonxa sonense e que contemplou en orixe a habilitación dun espazo axeitado e acorde coa renovación estética da contorna, que é o espazo que agora e inaugura. Dispón de máis de medio milleiro de metros cadrados e trátase dun andar baixo con dous bloques e con accesos independentes, cada un deles de 300 metros cadrados aproximadamente.
