Os socialistas rianxeiros fixeron balance da actividade do Goberno en 2024, en mans de Rianxo en Común. No comunicado o PSOE cualifica o exercicio dun “ano de retroceso e abandono institucional”. Foi, sinala o grupo de Óscar Rial, “un ano para esquecer, marcado pola maior perda de poboación da última década, cun descenso acumulado do 0,98%, un dato que reflicte non só o envellecemento da poboación e a busca de oportunidades laborais fora de Rianxo, senón tamén a inacción do grupo de Goberno, quen prefire maquillar a realidade en lugar de afrontala”, opina a agrupación no comunicado, engadindo que “Rianxo tivo a taxa de paro máis alta do último semestre de 2024, alcanzando un 7,73%, fronte ao 7,28% de Boiro e o 7,25% de Pobra do Caramiñal”.
Estes datos, sosteñen, “evidencian que mentres outros municipios próximos traballan por mitigar os efectos da crise, Rianxo afúndese na inacción do seu Goberno local”.
Para o grupo a situación comercial en Rianxo é “grave”, sendo “o noso concello o que menos comercio xera, o que non avanza na xeración de solo industrial, e a espera de que implante a empresa Stolt Sea Farm, para poder dicir que o Goberno xerou emprego”.
Os socialistas tamén reclaman no seu comunicado que o Concello entregue os datos sobre a participación dos veciños no Programa Integral de Emprego desenvolvido en colaboración cos concellos de Boiro e Pobra do Caramiñal no 2024: “Desde o PSOE de Rianxo reclamamos esta información de forma reiterada, especialmente para coñecer cantas persoas empadroadas de Rianxo participaron nestas iniciativas”.
Conclúen que “é hora de pasar das palabras á acción efectiva; urxe un cambio de rumbo que priorice a creación de emprego, a atracción de investimentos e a mellora das condicións de vida dos rianxeiros e rianxeiras”.
