O Concello de Boiro colabora con Comprarcasa Miraben nunha nova edición da campaña realizada durante o Nadal en beneficio de Cáritas. O alcalde, José Ramón Romero, participou na mañá deste 9 de xaneiro no peche da recollida solidaria xunto con Leticia Domínguez da empresa.
O lema da campaña realizada neste Nadal foi Merendas de Nadal cheas de historias, mediante a que se recolleron libros infantís e xuvenís, aínda que tamén de adultos, e alimentos propios das merendas de Nadal. Leticia Domínguez agradeceu a implicación de todas as persoas que fixeron as súas doazóns: “Estamos moi contentos co resultado obtido e da colaboración prestada para axudar ás familias dende Cáritas”.
“A sociedade boirense sempre se implica cando se trata de causas solidarias, vémolo nas empresas que organizan campañas como esta e tamén na resposta da veciñanza cada vez que se pide colaboración para un fin social”, recalcou o alcalde, José Ramón Romero.
