A escritora Iria Collazo vai presentar este venres en Rianxo o seu novo libro, Os mortos que amei (Editorial Galaxia): unha actividade encadrada no programa dos Actos Castelao 2025, cos que se conmemoran os 75 anos do pasamento do escritor rianxeiro en Bos Aires. A presentación dará comezo ás 20.30 horas na Sala Arcos Moldes do Auditorio Municipal de Rianxo.
Estarán presentes na cita literaria Antón Riveiro Coello (novelista e membro de Barbantia), María Xesús Blanco (presidenta de Barbantia), Marcos Calveiro (Editorial Galaxia) e Julián Bustelo (alcalde de Rianxo).
Contarase tamén coa participación do escritor Camilo Seira, que achegará unha intervención artística, e do pianista Leo Sánchez Figueiro, da Escola de Música de Rianxo.
Previamente, a Asociación Cultural Barbantia anunciou que vai celebrar a súa asemblea xeral ordinaria, no mesmo emprazamento da Sala Arcos Moldes. A primeira convocatoria dará comezo ás 18.30 e a segunda e derradeira a partir das 19.00 horas.
Sinopse de Os mortos que amei
Celeste decidiu fuxir con 83 anos, un día de abril, o mes en que abren as rosas das cerdeiras. Atopou a maleta onde levaría as súas pertenzas entre mantas e mantóns de estopa, la e angora; blusas de seda en tons pasteis e colo con brocado; bolsos de coiro de res criada coa mesta herba eterna da Pampa; broches dourados con forma de coleópteros máxicos…
O can Elvis e o seu consogro, Antón, taxista xubilado ao que sempre acompaña o fantasma da Vita, a súa muller, serán as únicas compañías na súa longa odisea cara ao Sur. Este é o relato da súa viaxe.
En Os mortos que amei, Iria Collazo escribe unha road trip disparatada a través de estampas da vida e da morte dos seus avós, co humor e a tenrura como protagonistas, que contan con nostalxia unha historia de amor imposíbel, onde todo o que coincide coa realidade é inventado.
Iria Collazo
Iria Collazo (1981) naceu en Barro, na mesma terra onde Celeste daba en turrar pola cavadora, e desde os sete anos reside en Moaña, a carón do mesmo mar en que Antón nunca foi quen de faenar.
É profesora de Ensino Secundario e, como dicía súa avoa, “literata”, con varias obras publicadas: Coma unha áncora (2015), A soidade das medusas (2016) e A casa do paralelo 54 (2019), todas na colección Costa Oeste de Editorial Galaxia. En 2020 publicou o poemario De casa queimada, gañador do segundo premio do certame Torre da Caldaloba. En 2021 recibiu a I Bolsa Intercambio Xacobeo 21 Galicia-Xeorxia e, grazas á estadía dun mes na Writer’s House de Tbilisi, puido rematar Os mortos que amei, dedicada á memoria dos seus avós.
