Os bombeiros dos parques Provinciais de Boiro e Ribeira traballan neste momento na extinción dun incendio que se declarou na planta de reciclaxe Servia, do Concello de Lousame. Ata o momento os danos son unicamente materiais. O incendio localízase na zona onde se almacena a chatarra e non está a afectar á nave.
Os Bombeiros de Boiro e de Ribeira e o GES de Noia colaboran nas tarefas de extinción deste incendio que non provocou danos persoais.
Pasadas as 17:50 horas, varios particulares que se atopaban no lugar contactaron co 112 Galicia e explicaron que saía fume e cheiraba a queimado na zona exterior das instalacións da planta de reciclaxe, situada na parroquia de Lesende.
De inmediato, desde o Centro Integrado de Atención ás Emerxencias activouse un operativo no que colaboran os Bombeiros de Boiro e Ribeira, o GES de Noia, os axentes da Garda Civil e os voluntarios de Protección Civil de Lousame. Ao mesmo tempo, informouse a Urxencias Sanitarias de Galicia-061 e ás autoridades medioambientais da Xunta de Galicia.
