O Laboratorio Ecosocial do Barbanza retoma neste inicio de 2025 as súas xornadas de voluntariado ambiental, unha iniciativa que busca implicar á cidadanía na recuperación da biodiversidade nos montes do Barbanza. Estas accións están coordinadas pola Fundación Montescola, entidade centrada na educación ambiental e a dinamización comunitaria.
A primeira xornada do ano celebrarase este venres 10 de xaneiro a partir das 10:00 horas e incluirá a plantación de árbores autóctonas e unha visita guiada ao monte da CMVMC de Froxán, en Lousame.
A actividade está aberta a persoas de todas as idades e non require experiencia previa. Para participar, as persoas interesadas deberán inscribirse ata o mércores 8 de xaneiro enviando un correo electrónico a info@montescola.org. Como é tradición, a xornada concluirá cun xantar comunitario de albaroque, unha celebración para agradecer o esforzo colectivo.
Dende a organización da xornada explican que “a recuperación das masas forestais de especies autóctonas é un dos piares fundamentais do Laboratorio Ecosocial do Barbanza, que impulsa diversas iniciativas en toda a comarca para promover a biodiversidade e reforzar as redes colaborativas locais. Esta primeira acción inaugura un programa de xornadas de voluntariado que se desenvolverán ao longo do ano”.
