Este xoves 23 de xaneiro celebrouse a presentación da nova Gala Solidaria a Beneficio da AECC (Asociación Española Contra o Cancro) de Ribeira, na que estivo presente o alcalde en funcións, Vicente Mariño, a concelleira de Cultura, Antía Alberte, a presidenta da AECC de Ribeira, María José Carreira, a vicepresidenta da mesma, Ramona Paz máis xerente de Mimarte, Tania Fuegho.
O tenente de alcalde introduciu esta gala solidaria sinalando que “é unha honra participar e colaborar coa Asociación Contra o Cancro” e que a Concellería que dirixe estará sempre á disposición da entidade, tanto “dende Servizos Sociais como dende a Concellería de Sanidade”. Mariño animou a toda a veciñanza a que participe nesta gala benéfica o vindeiro 8 de febreiro ás 20.00 h.
A concelleira de Cultura comezou felicitando a proposta e sinalando que “o auditorio está aberto para que as diferentes entidades de carácter social do municipio desenvolvan os actos necesarios para difundir as súas iniciativas á veciñanza”.
A continuación Tania Fuegho, xerente da academia de baile Mimarte, deu as grazas ao Concello por “acoller sempre as propostas e iniciativas que se propoñen” e adiantou que a gala “vai ser unha especie de noite de festa de José Luis Moreno pero ao estilo Mimarte, con baile, música, humor, amor e sobre todo diversión”.
Para rematar María José Carreira, informou que as entradas serán a un prezo simbólico de 5 euros e para poder mercalas haberá dous puntos de venda: un na propia sede da Asociación Contra o Cancro de Ribeira na rúa Estatuto no 1 e o outro no espazo Mimarte na avda. Rosalía de Castro no 54. Carreira explicou que os máis recentes datos publicados sinalan que a nosa comarca é unha das zonas con máis incidencia de cancro en Galicia e “tendo en conta estes datos, dende a asociación traballaremos con máis forza se cabe para recadar máis fondos para fomentar a investigación, xa que é un dos nosos obxectivos máis importantes”.
Poderase mercar entrada de fila cero para persoas que non poidan asistir á gala e queiran colaborar con este espectáculo solidario, tamén o mesmo día 8 no Auditorio será posíbel adquirir as entradas.
“Para nós é un día moi especial este 4 de febreiro, o Día Mundial Contra o Cancro, e a maiores desta gala tamén temos programados eventos como a colocación dunha mesa informativa na rúa de Galicia no mesmo día 4, uns obradoiros de manexo da ansiedade e relaxación que se levará a cabo na nosa sede, e tamén, en colaboración coa Parroquia de Ribeira, teremos unha misa solemne para lembrar a toda a veciñanza que sufriu un cancro durante o pasado ano 2024”, sinalou María José Carreira, engadindo que a misa será cantada pola Coral Polifónica do Circulo Mercantil o día 9 de febreiro ás 12.30 h. Carreira concluíu dando as grazas ao Concello, á Mimarte e a toda a xente solidaria de Ribeira.
