Este 31 de decembro deixounos Francisco Domínguez, Quico (Ribeira, 1944), tras unha grave enfermidade que o mantivo afastado da actividade cultural galeguista á que estivo ligado durante décadas, tanto dende a súa localidade natal como, sobre todo, dende a súa terra de adopción, Vigo, onde presidiu durante anos a Fundación Penzol, creada 1963 por iniciativa de Fermín Penzol e centrada en salvagardar e reivindicar a súa valiosa biblioteca centrada na temática galega e de gran interese para incontábeis investigadores da nosa cultura. Quico tamén tivo unha importante actividade política, xa que foi refundador e secretario da Organización do Partido Galeguista entre 1978 e 1982 e previamente dirixente do Partido Galego Socialdemócrata. Tamén foi presidente da editorial SEPT, accionista e conselleiro da Editorial Galaxia.
O seu falecemento foi comunicado pola Fundación Penzol deste xeito: “Unha fonda dor sentimos na Fundación Penzol ao comunicar o falecemento do noso padroeiro Francisco Domínguez Martínez (Santa Uxía de Ribeira, 1944-Vigo, 2024), o noso director case unha ducia de anos, entre 2010, cando sucedeu no cargo a Francisco Fernández del Riego, e 2021, ano en que decidiu retirarse da dirección. Incorporado ao galeguismo dende a mocidade, fixo desta causa de noso unha das súas razóns de ser. Por citar tan só tres dos seus compromisos, alén do xa aludido na Penzol: refundador e secretario de organización del Partido Galeguista (1978-1982); presidente da editorial SEPT e un dos impulsores da tradución da Biblia ao galego, e accionista e conselleiro da Editorial Galaxia. Pola súa coherencia vital e a fidelidade aos seus principios éticos, foi un exemplo a seguir para todas e todos nós”.
Nenez e mocidade
Quico nace no ano 1944 en Ribeira no barrio mariñeiro do Pombal, onde se conserva a casa familiar na contorna da praza de Teruel. O seu pai fora mestre represaliado na Guerra Civil debido á súa ideoloxía contraria ao movemento militar. Estudou Bacharelato en Ribeira logo perito industrial en Vigo, estudos que completou en Euskadi co título de enxeñeiro industrial. Logo volveu a Galicia e casou con Maribel Lens (filla do médico compostelán afincado en Ribeira, Humberto Lens) co que tivo dous fillos, Humberto e Sabela. Quico tamén era doutor da Universidade de Vigo.
