Este venres 20 de decembro terá lugar na Igrexa de San Xián de Laíño (Dodro), ás 20.00 horas, un concerto solidario de Nadal a cargo do Coro de cámara Ludus Tonalis.
Esta agrupación nace na Coruña no ano 1997, na actualidade está integrada por 8 compoñentes e ten como fin xeral “contribuír á recuperación e promoción do patrimonio coral galego mediante a investigación estudo e interpretación de obras corais da nosa cultura”.
Aínda que a súa especialidade é a interpretación de música antiga con preferencia a renacentista e a popular, a súa oferta musical é ampla e poden interpretar música antiga, medieval, moderna, pop, explicou o Concello de Dodro.
O venres Ludus Tonalis presentará a obra Lingua Nai, proposta pertencente ao Programa da Rede Cultural da Deputación da Coruña e aproveitará para amenizar este tempo de Nadal con composicións desta temática.
A entrada será de balde e en colaboración coa entidade Cáritas Dodro, solicitarase ao público a achega solidaria de alimentos e produtos non perecedoiros para axudar ás persoas e familias que o precisen.
