A presentación correu a cargo de Adolfo Enríquez, o fotógrafo responsábel das imaxes da publicación, e Miguel Mosteiro, coordinador gastronómico do libro e autor de varias das receitas propostas. Tamén contou coa participación de Alberto Carou, do restaurante Curral do Marqués, un dos cociñeiros que colaboraron no libro.
O cociñeiro Miguel Mosteiro e o fotógrafo Adolfo Enríquez, presentaron en Gastrolab Arousa o seu libro, La Guía de la Luz.
Faros de Galicia y su Gastronomía, unha publicación da que se editaron 2200 exemplares e que se atopa á venda en Gastrolab Arousa, ademais de en varias librerías de Santiago e nas tendas da Catedral.
Neste libro, exposto como unha guía turística e gastronómica, a presentación dos 35 faros galegos serve como vehículo para falar dalgúns dos produtos gastronómicos máis representativos de cada zona. A publicación contou coa colaboración de cociñeiras e cociñeiros como Alberto Carou, Lucía Freitas, Iván Domínguez, Caco Agrasar, Lara del Río ou Pedro Roca, entre moitos outros, que puxeron a súa creatividade ao servizo do libro e compartiron non só propostas de autor centradas en cada un dos produtos, senón tamén recomendacións de maridaxe para gozalas.
Na presentación, Mosteiro e Enríquez fixeron fincapé en que a publicación non é un libro de receitas, senón unha guía para descubrir a riqueza de Galicia desde un punto de vista paisaxístico, arquitectónico e gastronómico. Para iso, buscouse que o propio libro resultase visualmente atractivo, cunha edición moi coidada e imaxes de gran calidade. De feito, tal e como destacou Mosteiro, a primeira edición da Guía de la Luz foi adquirida practicamente na súa totalidade pola Agrupación industrial de Turismo de Galicia, que empregou o libro como ferramenta promocional. Con todo, Mosteiro non descartou a publicación dun próximo libro máis orientado aos amantes da cociña, no que si se detallen as indicacións para a elaboración de cada prato. O evento finalizou cun brinde do Nadal, no que os asistentes tiveron a oportunidade de intercambiar impresións con Mosteiro e Enríquez nun ambiente distendido.
