A xira dos Bolechas deste Nadal fará unha parada en Padrón o 27 de decembro

09 Decembro 2024

Volven Os Bolechas polo Nadal, e xa son uns cantos anos que a rapazada galega ten a sorte de poder festexar estas datas coa familia creada por Pepe Carreiro. A nova xira dos Bolechas foi dada a coñecer este luns 9 de decembro (no Pazo de San Roque, en Santiago) polo secretario xeral de Lingua, Valentín García, que sinalou que se trata dunha actividade do seu departamento para dinamizar o galego nestas datas e que a proposta, que conta coa colaboración da CRTVG e de Gadisa, percorrerá oito concellos galegos dende o 26 de de decembro até o 4 de xaneiro. A través da xira difundiranse entre a cativada os tradicionais Cantares de Reis.

Así o deu a coñecer hoxe en Santiago de Compostela o secretario xeral da Lingua, Valentín García, quen salientou que esta proposta “é xa unha cita cultural consolidada” entre as familias galegas na campaña de dinamización da lingua para estas festas.

O representante da Consellería de Cultura, Lingua e Xuventude explicou que esta actividade, de entrada libre e de balde, percorrerá, entre o 26 de decembro e o 4 de xaneiro, oito concellos galegos: os coruñeses de Padrón e Melide, os pontevedreses da Estrada e Redondela, os lucenses de Burela e Abadín e os ourensáns de Verín e Celanova.

Valentín García destacou o papel dos Bolechas como “referentes galegofalantes para a xente miúda” e puxo en valor que se tire proveito do “seu grande éxito” entre os máis pequenos e pequenas “para achegar dun xeito divertido o valor do rico patrimonio oral en galego co que se conta en Galicia” e conseguir que estes cantares “acaben incorporándose no repertorio de Nadal entre as novas xeracións e se recuperen entre as familias”.

A xira dos Bolechas cos Cantares de Reis comezará o xoves 26 de decembro na Estrada e, ao día seguinte, 27, fará parada en Padrón. A programación continuará en Melide, o sábado 28 de decembro, para achegarse a Celanova, o domingo 29 de decembro. Rematarase decembro cunha actuación o luns 30, en Burela.

Finalmente, os espectáculos dos Bolechas para este Nadal continuarán en xaneiro de 2025 cunha representación en Verín, o venres 3 de xaneiro, e outra en Redondela, o sábado 4 de xaneiro.

Toda a información coas datas exactas, lugares e horas pode consultarse no Portal da Lingua Galega e na Axenda de Cultura de Galicia.

Outros artigos

Publicidade

Revista en papel

Opinión

“Escoitar o vento”. Xosé Antonio López Silva

“Escoitar o vento”. Xosé Antonio López Silva

Cando a secretaria da Academia Sueca a chamou para comunicarlle a concesión do Nobel de Literatura, Anne Carson estaba en Islandia, segundo dixo, escoitando o vento. Aos setenta e seis anos, unha muller que viviu de ensinar grego antigo, traduciu a Safo e deulle nova...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.