O BNG emitiu un comunicado no que valora moi positivamente ter conseguido “sacar a diante, diante dun Goberno do PSOE en minoría (3 de 11), dúas mocións dirixidas a mellorar o rural de todas as aldeas”.
No comunicado recórdase a postura dos nacionalistas sobre as principais demandas do grupo para o rural do concello, manifestada o pasado 14 de novembro polo seu voceiro Xoán Bautista Mariño, quen sinalou que “desde hai anos o abandono do rural é evidente por parte dos distintos gobernos do Estado e da Xunta nas súas respectivas competencias; as aldeas baléiranse e a xente protesta ante a falta de amparo das administracións diante de normas de obrigado cumprimento que non axudan á maioría do territorio galego. A falta de iniciativas para cultivar, rexenerar, repoboar e por en valor os distintos territorios fan que a limpeza de fincas sexa a única opción que queda para evitar incendios e ter minimamente coidados espazos de toda a nosa xeografía. A lei Lei 3/2007, do 9 de abril, de prevención e defensa contra os incendios forestais é insuficiente”.
Ante as demandas transmitidas ao BNG pola veciñanza, o pleno aprobou instar á Consellería do Medio Rural a unha coordinación eficaz entre administracións, identificación mellor das parcelas e máis apoio material e persoal para o Concello de Dodro. O BNG pediu tamén ao goberno melloras na información e asesoramento dilixente en todos os casos necesarios.
A outra moción trataba o tema das infraestruturas de telecomunicacións que “xunto coa electricidade reséntense pola falta de mantemento pese a que se paga por elas”, sinalaron, engadindo que “sen oficinas de atención das compañías, postes caídos e tendidos obsoletos ao longo de todo o municipio dan idea do abandono que mesmo impiden novas altas para a veciñanza que desexa ter fibra óptica”.
O BNG preocupouse tamén “polas obras necesarias en camiños mal arranxados como en Revixós” ou a propia Casa Consistorial que, segundo lembraron, presenta importantes goteiras e humidades. Insistiu o voceiro nacionalista na “defensa das celebracións e festas tradicionais coma o magosto que este ano non fixo o goberno”.
Para o BNG, o goberno en minoría afecta igualmente a atención presencial nas dependencias municipais polo que o BNG “pide que haxa sempre, en horario de oficinas, un membro do equipo de executivo para atender tamén á veciñanza ou no seu defecto que elaboren un calendario para que a xente saiba cando e a onde acudir”.
