Coa intención de “desestacionalizar e dinamizar o comercio e a hostalería de Ribeira”, chega esta tempada a primeira edición de Toma Castaña, un roteiro temático co produto estrela do outono que vai a ser cociñado polos diferentes locais participantes da localidade. Os detalles da iniciativa foron dados a coñecer este 20 de novembro polo segundo tenente de alcalde, Francisco Suárez-Puerta que se encargou de explicar esta nova iniciativa do outono que promove Turismo de Ribeira. Segundo dixo, o obxectivo é enxalzar “un produto puramente do outono galego como é a castaña, que permite facer unha gran variedade pratos que se poderán degustar este venres 22 e o sábado 23 de novembro nos cinco locais participantes da hostalería de Ribeira”.
A listaxe de locais está integrada por Beizos Gastrobar (Foie con puré de castañas), Pizzeria D ́Vicio (D ́elicia de castaña), A Recoveira (Vaia castañazo!), Chiringuito Pedra Pateira (Delicia de outono!) e A Caseira (Castañazo).
Suárez-Puerta insistiu no feito da desestacionalización e seguir traballando nela precisamente nestas datas de menos afluencia e sinalou “conseguir que veciños de toda a comarca e turistas se acheguen a Ribeira e poidan gozar do produto estrela do outono galego e da hostalería local”. Tamén engadiu que “os petiscos non terán custe algún; a idea é pouco a pouco ir asentando no tempo este tipo de actividades para reforzar a afluencia de xente en tempada baixa”.
Co recente éxito da Ruta do Lirio e Máis que Tapas” incorpórase ao calendario de roteiros gastronómicos Toma Castaña nesta primeira edición.
