Cada vez hai menos capturas, menos pescadores e poucos ingresos por iso é polo que sexa importante para o sector extractivo asistir ao xerme de novas organizacións pesqueiras nas rías galegas que pretendan, entre outras iniciativas, implantar a comercialización dentro do sector. Unha maneira de que o valor engadido das capturas recaia nos propios produtores e non nos intermediarios.
O futuro do mundo da pesca discorre por camiños diferentes ao dos nosos pais e avós. A economía de subsistencia non é suficiente para os mozos pescadores e para vivir da pesca non desexan ser escravos do traballo, de sol a sol, e se en cambio queren obter a rendibilidade que se merecen a través de colocar as especies capturadas directamente no propio mercado.
É moi necesario tamén que haxa diferentes organizacións que ofrezan outros puntos de vista e presentar demandas innovadoras ás administracións pesqueiras e así poidan destinar fondos para mellorar os puntos de venda de peixes e mariscos; o emprego habitual das novas tecnoloxías; o fomento da formación e o contacto con outras comunidades pesqueiras para intercambiar experiencias; presentar campañas de promoción de determinadas especies así como realizar un control de vixilancia máis eficaz, sen esquecer a necesidade de que cada organización conte co apoio investigador necesario para sacar o maior rendemento, segundo zonas e épocas, de determinadas especies ata o de agora con escaso valor comercial.
