O Concello de Outes decidiu aprazar a XXVI edición do Encontro dos Maiores por mor dos problemas que está a sufrir o abastecemento de auga para consumo no termo municipal, que, como lembraremos, provocou varios casos de gastroenterite na veciñanza por contaminación microbiolóxica. En palabras do Goberno local, “co obxectivo de velar pola saúde da nosa terceira idade, pospoñemos o Encontro dos Maiores, que estaba previsto para este sábado 26 de outubro, ate novo aviso á espera de que a Consellaría de Sanidade da Xunta de Galicia remate de elaborar todas as analíticas pertinentes e se levante a prohibición de consumo de auga”.
Dende o Concello recoñecen a súa intención de “celebrar a xuntanza coa maior brevidade posíbel, pero garantindo sempre as mellores condicións sanitarias”. Engaden que informarán da nova data do encontro en canto se conte co visto e prace da Consellería e sexan levantadas as restricións e a loxística o permita. As reservas xa feitas manteranse e non será preciso, por tanto, anotarse de novo.
