O Goberno local do Concello de Muros leva ao pleno ordinario desta tarde o uso de máis de 200.000 euros do remanente municipal para obras e gasto social.
Por unha parte, realizaranse nas próximas semanas obras e actuacións no casco urbano e as parroquias para pavimentar vías e camiños, melloras no saneamento e abastecemento, ou na rede de alumeado.
“Obras necesarias para mellorar os servizos que o concello presta aos veciños, renovando infraestruturas públicas e dando resposta ás demandas veciñais”, explica a alcaldesa, María Lago.
Outra partida importante será para gasto social, en concreto para o Servizo de Axuda no Fogar e para o arranxo dun vehículo de transporte adaptado.
“Os concellos asumimos a ampliación de horas no servizo e ademais o persoal de Axuda no Fogar tiña que cobrar o quilometraxe e non o cobraban en Muros; é algo ao que teñen dereito e recolle a lei, polo que nós comezamos a pagalo”, engadiu a alcaldesa.
A sesión plenaria deste xoves 31 de outubro aprobará tamén a nova imaxe corporativa do Concello de Muros, presentada recentemente á veciñanza.
