O 20 de outubro ás 10.00 horas vaise celebrar unha proba (a terceira) da VIII edición da Orientación no Monte Cabeiro (Orientasón), organizada novamente pola ADC Arnela. Segundo informan dende a organización, trátase dunha proba apta para todas as idades e condicións físicas, achegándose como “unha oportunidade ideal para iniciarnos na práctica da orientación ou vir afianzar os nosos coñecemento”.
Engaden que “non fai falla correr nin ter experiencia previa, a ADC Arnela estará aí para axudarnos no que precisemos”. Temos ata o martes 15 de outubro ás 23:50 para anotarvos en liña na web habilitada.
Para quen non o saiba, o deporte de orientación é unha actividade que combina a práctica física coa navegación na natureza ou, tamén, en espazos urbanos. Consiste en que cada participante, coa axuda dun mapa e un compás, tense que orientar por camiños descoñecidos ata atopar, nunha orde determinada, os puntos de control que se marcaron sobre o terreo. O reto deberá facerse no menor tempo posíbel. Estes puntos de control poden ser balizas ou estar marcados de forma electrónica e adoitan situarse en zonas de difícil acceso.
