O segundo tenente de alcalde e concelleiro de Turismo de Ribeira, Francisco Suárez-Puerta, presentou na mañá deste martes 3 de setembro tres novos roteiros deseñados polo seu departamento: un novo programa de 3 itinerarios desenvolvidos para mergullar a visitantes e residentes “na rica e densa historia do noso concello”, sinalou, engadindo que estes roteiros, que estarán dispoñíbeis durante o mes de setembro e outubro, “foron coidadosamente seleccionados para que as persoas que se animen a percorrelos poidan explorar e conectar con eventos e personaxes históricos significativos, coñecer a riqueza da cultura mariñeira, así como gozar da beleza das paisaxes”.
Ademais, dixo, “neste programa exploraranse os momentos clave que formaron a identidade das nosas vilas mariñeiras e observaremos como evolucionou desde as súas orixes ata o presente”.
O obxectivo do programa é amosar unha visión completa das vilas que se visitan (Castiñeiras, Aguiño, Ribeira e Palmeira), comprendendo non só a súa historia e evolución, senón tamén o desenvolvemento da súa comunidade ao longo do tempo.
Estes roteiros están pensados para explicar in situ a evolución de Ribeira, Castiñeiras, Aguiño e Palmeira no século XX, os peiraos, a evolución das fábricas, a salgadura, os fomentadores cataláns, as fachadas marítimas, a arquitectura de comezos de século…. As explicacións do guía serán contrastadas con fotografías restauradas da época.
Suárez-Puerta manifestou “estes roteiros están deseñados tanto para visitantes como para a propia veciñanza e tamén, como non para que os colexios de tódalas parroquias”, engadiu “que se comezará con estes tres roteiros pero que a intención é traballar no futuro para incorporar a tódalas parroquias”.
1. Camiño de Onte (Ribeira)
2. Camiño do Sal (Castiñeiras- Aguiño)
3. Camiño do Castelo (Palmeira)
