O negocio, os beneficios así como a creación de emprego son algúns dos obxectivos da maioría das empresas. Persoas, colectivos ou grupos de profesionais que buscan mellorar as súas situacións persoais, familiares e indirectamente a súa contorna máis próxima a través do emprendemento. Como sucede, na maioría das ocasións, que sempre hai algúns denominados “empresarios” que non lles preocupa os medios utilizados para conseguir os obxectivos establecidos.
Non respectan o medio ambiente, non cumpren coa lexislación laboral nin velan polos dereitos humanos dos seus traballadores. Xornadas de traballo excesivas e salarios de miseria, percibidos en efectivo cando terían que abonalos a través da conta bancaria. O rexistro da xornada está manipulado, non se axusta á realidade e que os traballadores asinan por medo a perder o posto de traballo que constitúe o seu único medio de vida.
Condicións de traballo moi precarias, maiormente en períodos nocturnos, sen medidas de prevención nin protección persoal.
Non resulta estraño que moitos deses traballadores se pregunten para que están as centrais sindicais e as inspeccións de traballo, porque eles continúan vivindo ese inferno, durante anos e anos. As empresas presumen, publicamente, dos seus bos resultados económicos pero cando se lles fala sobre as condicións dos seus traballadores alegan que son falsidades todo o negativo que se diga sobre as mesmas.
