O alcalde de Rianxo, Julián Bustelo, mostrouse moi crítico coa suba do canon de SOGAMA (Sociedade Galega de Medio Ambiente) pola recollida e tratamento dos residuos que terán que asumir os concellos (un incremento que partiría dos iniciais 66 euros por tonelada a 108 euros en 2025). Nas súas declaracións advertiu “do grave impacto sobre o orzamento municipal do 2025 que terá esta suba anunciada pola Xunta, unha decisión unilateral que unha vez máis afoga a economía dos concellos”.
Bustelo uniuse deste xeito ao cada vez máis nutrido grupo de alcaldes e alcaldesas de toda Galicia que esixen “unha rectificación e unha negociación cos municipios, xa que o incremento é desproporcionado”. Segundo indicou, “a Xunta anunciou hai uns días un canon único e incrementado para todos os concellos, que no ano 2025 pasará de 66 euros por tonelada de residuo a 108 euros. No caso de Rianxo, esta subida suporá pasar a pagar 150.000 euros máis ao ano”.
“O imposto ao que fan referencia para xustificar a decisión é un imposto derivado dunha Directiva europea e que grava a incineración e o depósito en vertedoiro, as fórmulas que usa SOGAMA de forma prioritaria, en contra de todas as recomendacións europeas e en vez de apostar por un plan de residuos que fomente a reutilización e a reciclaxe”, engadiu o alcalde rianxeiro.
